A xornalista Rosa María Calaf visitou Santiago de Compostela para ofrecer una conferencia sobre a crítica situación que atravesa hoxe en día o xornalismo internacional, nun acto organizado pola APSC con motivo do día do Patrón dos xornalistas.

A partir da súa propia experiencia, a máis veterana das correspondentes da TVE, amosou a súa preocupación polo estado actual da profesión e advertiu que “o xornalismo internacional debería estar na UCI, pero atópase tirado no corredor”. Unha situación que se ve agravada polo interese do público, que reclama unha información máis “próxima e inmediata”, así como polas estratexias comerciais das empresas da comunicación, que prescinden dos “especialistas en internacional e dos correspondentes” e guíanse pola información das grandes axencias, o que leva á uniformidade nas publicacións.

“Os correspondentes internacionais somos unha especie en extinción”, afirmou Calaf. “Nun mundo globalizado coma iste, no que a información vai e vén de todas as partes, é cando menos importancia se lle está a prestar ao verdadeiro xornalismo. O que pasa hoxe noutros lugares afectaranos mañá directamente”.

Rosa María Calaf, recoñecida no mundo enteiro polo seu “cabelo colorado e un mechón de pelo branco” pode presumir dos 38 anos de traballo como periodista nos que chegou a dirixir numerosas delegacións no exterior, entre elas as de Hong Kong, Buenos Aires, Roma, Moscú, New York e Pequín, e realizou numerosos desprazamientos polo mundo, onde destacou sempre polo seu compromiso, calidade, implicación, continuidade e trascendencia. Debido ao recente ERE que TVE levou a cabo no seu plantel, Rosa María Calaf tivo que acollerse a esta medida laboral, que criticou duramente xa que aparta á xente que, como ela, posúe unha amplaia experiencia, sendo precisamente a súa visita a Compostela a primera tras o seu último traballo na TVE, gravado en Filipinas.

A conferencia rematou cun animado cooquio promovido polo público asistente, que encheu o salón de actos do Club Internacional de Prensa. Tras o evento, as socias e socios da APSC participaron nunha comida con Rosa María Calaf que serviu para coñecer aínda máis as numerosas anécdotas e situacións vividas pola prestixiosa xornalista ao longo da súa carreira.