A Asociación de Periodistas Vascos-Euskal Kazetarien Elkartea (APV-EKE) e a Federación de Asociacións de Periodistas de Galicia (FEGAPE), ambas a dúas co respaldo da Federación de Asociacións de Periodistas de España (FAPE) solicítanlle ós partidos políticos, ás institucións e ós outros organismos as máximas facilidades para que os profesionais dos medios poidan exercer libremente o seu labor, tanto dende o punto de vista técnico e loxístico como no que respecta ós contidos, de forma que se lles dean facilidades para o seguimento dos actos electorais, e poidan cumprir sen trabas cos procedementos periodísticos nas campañas que agora dan comezo no País Vasco e Galicia, con vistas ás eleccións do vindeiro 1 de marzo.

Ademais, a APV-EKE e a FEGAPE queren manifestar a súa preocupación pola cada vez máis habitual práctica dos partidos políticos de cociñar as súas propias informacións e as distribúan ós medios co obxectivo de que estes as transmitan como se foran informacións elaboradas polos seus propios profesionais. Por mor das presas ou da precariedade do seu equipo, algúns medios difúndenas sen citar a procedencia e sen avisar ás súas audiencias de que foron elaboradas con fins partidistas. Ambas asociacións profesionais instan ós medios a que fagan uso da transparencia informativa e aclaren a orixe desas imaxes, cortes de voz ou textos escritos.

Do mesmo xeito, avogan por unha clara diferenciación entre información e opinión, ou propaganda electoral, para que en ningún caso poidan confundir á cidadanía, isto é, ó electorado.