A Unió de Periodistes Valencians ten un novo presidente. Trátase do xornalista valenciano Joaquim Clemente, delegado na Comunitat Valenciana do diario económico Cinco Días. O cambio na presidencia da asociación, dirixida ata o momento por Amparo Bou (Cadena Ser), tivo lugar tras as eleccións celebradas na Asemblea Extraordinaria do 24 de febreiro, no colexio maior Rector Peset da cidade.

A candidatura de Clemente, quen ocupará o cargo de presidente durante os próximos catro anos, incorpora a seguinte lista: Remei Castelló, Cristina Chirivella, Carla Aliño, María Quesada, Kai Försterling, Andrés Hernández de Sá, Joan Oleaque, Antoni Rubio,  Sergi Pitarch e Javier Alfonso. Unha vez constituída a nova Comisión Executiva, nomearanse aos cargos de vicepresidentes/as, secretario/a xeral e tesoureiro/a de entre os seus membros.

A presidenta saínte, Amparo Bou, fixo balance dos últimos catro anos ao fronte da Unió de Periodistes e agradeceu o esforzo e traballo dos vicepresidentes Manuel Peris (xefe de prensa da Universitat de València) e Jose Ricardo Seguí (xefe da sección de cultura no xornal Levante-EMV) así como o do resto de persoas que estiveron na Executiva durante o seu mandato.

Por outra banda, o novo presidente da organización, Joaquim Clemente, sinalou como un dos seus obxectivos, “e ante a precaria situación que sofre a profesión e que quizais empeore, a necesidade de dotar aos socios de máis formación e ferramentas que sexan útiles á hora de ter un futuro dentro do xornalismo”.

Precisamente, na Asemblea Ordinaria que se celebrou antes das eleccións, os socios reunidos manifestaron a súa preocupación pola grave situación laboral dos xornalistas, e ademais do maltrato e do desprestixio que os profesionais da información tamén padecen. Asemade, incidiu na degradación laboral que viven moitos dos mozos/as que se incorporan ao periodismo.

Por último, a Asemblea decidiu os Premis Llibertat d’Expressió 2009, que este ano se entregarán a Roberto Saviano,  J.J. Pérez Benlloch e Gervasio Sánchez.