A xornalista Mara Torres e o equipo de Noticias 2 de TVE, a fotógrafa Susana Vera e o periodista mexicano Humberto Padgett, foron os finalistas da primeira edición do premio “La Pepa 1812”, que galardoou os seus  traballos de denuncia sobre os problemas de violencia e marxinación presentes hoxe en día nun gran número de sociedades e países do mundo.

“É un verdadeiro orgullo a concesión deste premio, que non só me corresponde a min, senón ao traballo colectivo que facemos na revista, que é un medio pequeno que aposta polos contidos de fondo nun mercado xornalístico no que a concentración da publicidade noutros medios fai a supervivencia moi difícil manifestou Humberto Padgett, gañador da categoría de Prensa Escrita polo seu traballo “El regreso del secuestro”, publicado en “Emeequis”, o 11 de agosto de 2008, que trata sobre o desamparo dos cidadáns ante a ineficacia do sistema xudicial á hora de afrontar o crime organizado dedicado ao secuestro en México.

Mara Torres e o seu equipo obtiveron o galardón de Audiovisual polo traballo titulado “Especial sesenta aniversario de los Derechos Humanos”, que foi emitido por La2 de TVE o pasado 10 de decembro de 2008. “Este é un recoñecemento moi importante da nosa loita para que non queden silenciadas as vulneracións dos Dereitos Humanos. É un honor ser os primeiros en gañar este Premio, a todo un equipo de redacción de entre 26 e 35 anos, que comparte os mesmos ideais”, dixo Mara Torres despois de que se lle comunicara o fallo do xurado.

O xurado, encabezado pola presidenta da FAPE, Magis Iglesias, destacou que o programa de Torres era un “notable exemplo de traballo en equipo, integrado neste caso por profesionais menores de 35 anos, que dedican unha atención permanente á defensa dos Dereitos Humanos na súa actividade informativa”.

Asemade, o xurado decidiu outorgar unha mención honorífica a “Diario del Juicio”, portal da organización arxentina H.I.J.O.S., sobre o xuízo dos militares arxentinos involucrados na represión durante a dictadura de Videla entre 1976 e 1983.

Susana Vera Pascual, obtivo o premio de Fotografía por unha serie de imaxes titulada “Amazonía: la lucha por la supervivencia”, publicadas en “XL Semanal”, do 7 ao 13 de setembro de 2008. “É unha grande alegría recibir este Premio, que é un xeito de que saían á luz unha realidades que habitualmente quedan ocultas, como é a loita dos indíxenas da Amazonía pola supervivencia en condicións extremas”, dixo Susana Vera.

O xurado sinalou a alta calidade artística das fotografías, que reflicten a loita dos indíxenas da Amazonía por sobrevivir e manter as súas ancestrais culturas fronte ao avance dunha civilización que lle arrebata as súas terras e afoga o pulmón do planeta que é o seu fogar.