Finalmente por 383 votos a favor, 108 en contra e 21 abstencións a asemblea xeral da Fape celebrada en Sevilla acordou rexeitar a Asemblea de Mulleres Xornalistas, creada por mandato asembleario o pasado ano na asemblea de Zaragoza. Ao mesmo tempo con esa votación aprobouse a proposta da Xunta Directiva de reconverter a AMX nunha comisión de traballo dependente dos órganos de goberno da FAPE.

Sen dúbida este foi o punto máis discutido da asemblea sevillana. Viña precedido dunha prolongada polémica entre as promotoras da AMX, entre as que había mulleres xornalistas de asociacións de toda España, e a Xunta Directiva da FAPE desconforme co devir da AMX por entender que a súa posible xestión autónoma ía en contra dos Estatutos. A presidenta da comisión directiva da AMX, Laura Nieto, indicou ao comezo dos debates o seu acatamento as directrices de FAPE pero solicitou, por medio da Asociación de Granada á que pertence, a convocatoria dunha asemblea extraordinaria na que se presentaría unha reforma estatutaria para dar cobertura a AMX.

Lucía Odriozola, directiva de FAPE encargada dos temas de igualdade, rexeitou esta posibilidade e acusou ás compoñentes da AMX de desviarse do espírito da votación de Zaragoza, ao solicitar, entre outras demandas, unha xestión económica independente, extremo este que Laura Nieto desmentiu. No debate tamén interviu o asesor xurídico de FAPE, Carlos Hernández Sanjuan, quen dixo que a proposta da Directiva de FAPE de crear unha comisión axustábase aos Estatutos aínda que no seu día deu por bo o acordo aprobado en Zaragoza.

A postura da APSC, defendida polo seu presidente Luís Menéndez, que tamén pertence a Xunta Directiva de FAPE, foi sempre dun esforzo a favor dun acordo entre as dúas partes e neste punto solicitou un calendario de reunións periódicas. Tamén explicitou o acordo do 10/03/09 da Xunta Directiva de APSC no que se apoiaba a Asemblea de Mulleres baixo o acordo ó que se chegue coa Xunta Directiva de FAPE sen desbotar unha reforma estatutaria. Asegurou a importancia da creación da Agrupación de Mulleres Xornalistas da APSC, que preside Xulia Campo, e amosou o seu apoio a estas iniciativas.

A votación final tivo unha maioría a favor da iniciativa da Xunta Directiva. O voto foi ponderado en número de socios (Madrid ten 180, e votou a favor), a APSC optou pola abstención. Laura Nieto e a comisión directiva da AMX presentaron a dimisión.