O presidente da APSC,  Luís Menéndez,  acaba de chegar de Bruxelas onde, como representante para o exterior de FAPE, mantivo varios encontros coa Federación Internacional de Xornalistas (FIJ), entre eles, co secretario xeral, Aidan White e  o presidente da sección europea da FIJ, Arne König.

O motivo das reunións foi fundamentalmente a situación dos xornalistas españois, representados por FAPE, nesta instituución profesional internacional -que representa a 600.000 xornalistas en todo o mundo- e, máis en concreto, a celebración no vindeiro ano do Congreso Internacional da FIJ en Cádiz e a posibilidade de celebrar o Congreso Europeo no mes de abril na cidade de Santiago de Compostela.

Neste sentido, Arne König manifestou a Luís Menéndez que as conversas ían por bó camiño e que o Secretariado Xeral da FIJ podería tomar a decisión favorable no vindeiro Congreso que se celebrará o próximo mes de maio en Varma (Bulgaria). En caso de que a decisión sexa positiva sería unha gran ocasión para reunir en Compostela a xornalistas de todo o vello continente no ano Xacobeo 2010, sendo precisamente un ano importante para a FIJ-Europa, xa que se teñen que renovar os seus cargos directivos.