A Federación de Asociacións de Xornalistas de España (FAPE) e o Ministerio do Interior acordaron unificar os distintivos dos xornalistas encargados de cubrir manifestacións, catástrofes e accidentes.

Este é un dos puntos do convenio que asinarán FAPE e Ministerio do Interior nas próximas semanas e que dirixirá recomendaciones a xornalistas e forzas de seguridade para que ningunha das partes entorpeza o traballo da outra.
A este acordo chegouse tras unha entrevista do ministro do Interior, Alfredo Pérez Rubalcaba, o secretario de Estado de Seguridade, Antonio Camacho, e a presidenta da FAPE, Magis Iglesias, acompañada do secretario xeral da organización, Javier Arenas.

O distintivo, que poderán portar os xornalistas que os soliciten, servirá para que as forzas de seguridade distingan ós informadores e faciliten o seu labor cando cubran acontecementos violentos.

A FAPE e o Ministerio do Interior buscarán homologar estes distintivos cos xa existentes, incluídas as autonomías ás que foron transferidas as competencias de Interior (País Vasco e Cataluña).

Durante a entrevista, a presidenta da FAPE transmitiu ó ministro a súa preocupación pola multiplicación de incidentes nos que os informadores se converten en vítimas de disturbios e manifestacións violentas. “Ben sexa porque sofren os golpes das forzas de seguridade destinados aos que alteran a orde pública ou porque son agredidos polos manifestantes ante a pasividade dos axentes”, sinalou.

O convenio foi proposto pola FAPE tralos últimos ataques a xornalistas nas manifestacións anti-Bolonia de Barcelona, o pasado 18 de marzo, e a recente campaña electoral no País Vasco, durante o mes de febreiro. Varios compañeiros (operadores de cámara e fotógrafos) foron atacados por manifestantes abertzales e os seus materiais resultaron esnaquizados sen que recibisen auxilio por parte da policía autónoma vasca.

O mesmo 18 de marzo un compañeiro da radiotelevisión andaluza resultou agredido cando informaba da detención dun empresario en Olula do Río (Almería) sen recibir asistencia dos axentes da Garda Civil alí presentes.

“Os xornalistas somos conscientes das dificultades ás que se enfrontan os Corpos e Forzas de Seguridade do Estado con ocasión de disturbios ou grandes protestas”,  indicou a presidenta da FAPE ó término do encontro co ministro do Interior.  “Con todo, non podemos permitir que os profesionais da información vaian desprotexidos a estas situacións”. Os responsables da orde pública tamén o son da seguridade dos xornalistas cando cumpren coa súa misión de informar”, recordou Magis Iglesias.