A Xunta Directiva de FAPE e a Asociación de Periodistas de Santiago (APSC)  apoian e comparten os obxectivos do Manifesto de Comisións Obreiras (CC OO) e animan á participación nos actos do día 7 “en defensa do emprego de calidade” nos medios de comunicación.

MANIFESTO DO SECTOR DE MEDIOS DE COMUNICACIÓN DE  FSC-CCOO EN DEFENSA DO EMPREGO DE CALIDADE

Desde o Sector de Medios de Comunicación de FSC-CCOO e a través das seccións sindicais e delegados de CC OO convocamos os profesionais dos medios de comunicación para que o 7 de maio se mobilicen en denuncia da situación de crise e en defensa do emprego de calidade, a mellor garantía para que os medios tamén ofrezan a mellor información á cidadanía.

As consecuencias da actual crise económica agudizaron a permanente situación de precariedade laboral e profesional dos medios de comunicación. Pasamos do traballo sen remunerar (bolseiros) e da temporalidade e os salarios máis próximos ao SMI que aos 1000 euros, aos despedimentos masivos e aos peches de empresas.

Os traballadores dos medios de comunicación estamos padecendo o recruamento da xa permanente precarización das nosas condicións laborais que, de forma unilateral e sen procurar solucións dialogadas, están acometendo as empresas. Os expedientes de regulación de emprego, os despedimentos colectivos e os peches de empresa por mala xestión, xunto á paralización de negociacións colectivas ou a amortización de postos de traballo mediante baixas incentivadas e prexubilacións son a triste realidade cotiá.

A expansión económica e corporativa desenvolvida polos grupos mediáticos dos últimos anos non preveu a posibilidade de ter que afrontar períodos de crise como o actual, ao non investir os cuantiosos beneficios obtidos no reforzamento das capacidades produtivas. A moitos medios de comunicación, a crise sérvelles de pretexto para acometeren axustes e recortes laborais, mentres axitan o fantasma do medo xerado pola situación de inseguridade laboral actual.

Achámonos, asemade, en pleno proceso de reconversión sectorial dixital, que atinxe a televisión, a radio e a prensa; este proceso debería afrontarse desde concepcións de progreso, que permitisen cumprir coa función de servizo que lles é propia, ampliando o seu alcance e acceso social, e que, porén, estase a acometer desde a ambigüidade e con receitas tendentes a cuestionar dereitos laborais e profesionais, ademais de poñer en dúbida o mantemento do actual nivel de emprego, que xa se axustou ao máximo.

A información é un ámbito crucial e estructural nunha sociedade democrática e, malia iso, está sometida a unha permanente precariedade laboral e desconsideración profesional. A actual crise agudizou esta situación, polo que non é posible esperar unha solución se non é pola nosa intervención, desde a firmeza, a responsabilidade e o rigor acreditados, e desde a maior unidade das organizacións representativas dos medios de comunicación.

Topámonos nunha espiral de desestructuración laboral e profesional dos medios que non ten trazas de remitir, senón todo o contrario. A continua perda de empregos e de dereitos laborais e profesionais auspiciada pola crise require que nos mobilicemos para denunciar esta situación e promover a adopción medidas que eviten unha deterioración irreversible da viabilidade dos medios e da súa calidade informativa.

Noutros sectores industriais e de servizos xa se están mobilizando a prol do seu emprego, e en moitas cidades son numerosas as mobilizacións contra a crise e polo emprego que se desenvolveron e as que están programadas, entre as que destaca a promovida pola Confederación Europea de Sindicatos, para que o 14 de maio Madrid se ateigue de voces contra a crise vindas de todo o estado, de Portugal e de Francia. O sector de medios de comunicación tamén ha contribuír á defensa do seu emprego e, ao tempo, denunciar os responsables desta situación e propoñer que se adopten medidas que garantan o emprego, a calidade e a pluralidade imprescindibles, entre as que estarían:

- A paralización de todos os procesos de regulación de emprego que non acrediten condicións de acordo entre a dirección e a representación sindical das empresas.

- A intervención exhaustiva de oficio das instancias de control administrativo e laboral (Inspección de Traballo, Axencia Tributaria, Tesourería Xeral do INSS) sobre as situacións de irregularidade laboral e fiscal, para evitaren situacións de precariedade e de fraude que condicionen a viabilidade das empresas.

-  A promoción da Mesa sobre a situación dos medios, composta polo Goberno e polos axentes representativos (sindicais, profesionais e empresariais), que aborde a necesidade de adoptar medidas públicas que reforcen as condicións necesarias para a viabilidade dos medios.

- A necesidade de avanzar e consolidar, como indicamos nas nosas propostas para a nova Lei xeral audiovisual, un modelo de radio, televisión e novos servizos de comunicación que cumpra coas súas funcións de servizo público de calidade na programación, e cos dereitos laborais.

Desde CC OO non imos permitir que os traballadores, que xa teñen padecido e padecen a precariedade do sector, agora teñan que pagar tamén pola mala xestión empresarial.

Por iso, como primeiro paso, desde o Sector de Medios de Comunicación de CC OO, baixo o lema EMPREGO DE CALIDADE NOS MEDIOS É INFORMACIÓN DE CALIDADE, imos desenvolver o 7 de maio de 2009, desde as seccións sindicais e delegados nas empresas de medios de comunicación, unha iniciativa estatal de accións reivindicativas desde os propios medios, que denuncien as situacións de conflito e de crise e as súas consecuencias, e que expoñan, alto e claro, que os medios de comunicación precisan de todo o apoio posible para mantérense, seren viables e ofreceren unha información de calidade e plural; e que ante as receitas de máis despedimentos e recortes de dereitos van ternos en fronte, tanto patronais como administracións