A Asociación da Prensa de Santiago de Compostela (APSC) manifesta o seu rexeitamento unha vez máis (ao igual que fixera anteriormente, en 1997, 2001 e 2005) aos nomeamentos para os cargos de conselleiros do consello de Administración da CRTVG e do consello asesor da RTVE-G que recaeron, por parte dos tres partidos políticos galegos PP, PSOE e BNG, maioritariamente en persoas alleas por completo á profesión xornalística, en virtude de preferencias políticas ou compromisos. Nesta ocasión hai que salientar que, alomenos, tanto o PP coma o PSdeG-PSOE nomearon, cada un, dous coñecidos xornalistas, sendo excepción, xa que só representan ao 33% dun consello da CRTVG composto por doce membros entre os que hai industriais, profesores, sindicalistas, avogados, funcionarios e edís municipais. No caso do consello asesor de RTVE-G tamén vai incrementándose o número de especialistas e nos últimos nomeamentos, dos trece compoñentes, seis son xornalistas (3 do PP, 2 do PSOE e 1 do BNG).

Coma noutras ocasións, a APSC apela o criterio do artigo 7 da Lei 9/1984 de creación da CRTVG e os artigos 7 e 9 da Lei 4/1980 do Estatuto da RTVE que sinalan que os mencionados nomeamentos sexan elixidos “entre persoas de acreditado prestixio profesional” referíndose aos medios de comunicación.

Por último a APSC rexeita que, en tempo de austeridade económica, os membros de CRTVG aproben unhas retribucións por persoa que superan os 7.000 euros mensuais, debido ás compensacións por asistencia a consellos e comisións, dietas e quilometraxe.