A Asociación de la Prensa de Madrid, o Col.legi de Periodistes de Catalunya, o Colexio Profesional de Xornalistas de Galicia e a Unió de Periodistes Valencians apoian un plan de axuda gobernamental ao sector dos medios, sempre que teña como obxectivo a defensa do traballo, a creación de emprego de calidade e o mantemento da dignidade profesional dos profesionais do xornalismo.
 
Nesta declaración conxunta, as catro entidades expoñen que as axudas do Goberno teñen que servir para crear postos de traballo e non para financiar expedientes de regulación de emprego ou despedimentos. Na súa proposta formulan que, para superar a actual crise que se vive nos medios, é preciso apostar pola calidade profesional e por un maior respecto ás normas éticas e deontolóxicas.

As catro organizacións subliñan que as axudas públicas propostas en forma de créditos, aprazamentos de cotas sociais ou axudas directas á difusión e á formación teñen que ser transparentes e con compromisos claros por parte de quen se favorece delas, incluídos os xornalistas. Pola parte dos editores tamén solicitan un compromiso que sirva para garantir a independencia, a autonomía e a profesionalidade de medios e xornalistas.