A Federación Galega de Asociacións de Periodistas, FEGAPE, acordou, na xuntanza do seu Consello Directivo celebrado en Santiago, ampliarse e aceptar asociacións vinculadas, de xeito que incrementa a súa representatividade no xornalismo de Galicia.

A Asociación de Periodistas Deportivos, con 187 socios, e a Asociación de Periodistas de Galicia, con 90, son as primeiras organizacións profesionais que son aceptadas dentro de FEGAPE como vinculadas, de xeito que pasan a ter voz e voto dentro da Federación.

Coa incorporación destas duas organizacións, a Federación Galega de Asociacións de Periodistas, que preside Manuel González Menéndez, conta xa cun censo de oitocentos periodistas que exercen o seu labor profesional na nosa Comunidade,

A FEGAPE é unha organización que abrangue as asociacións históricas de xornalistas que hai actualmente en Galicia: A Asociación da Coruña, a de Santiago de Compostela, a de Lugo e a de Vigo, que forman parte da Federación de Asociacións de Periodistas de España, FAPE, que representa a gran parte dos profesionais do xornalismo do Estado. Refundada no 2008, ten como obxectivo principal defender os intereses dos xornalistas galegos ou que traballan en Galicia, tanto desde o punto de vista profesional coma social.

Nesta xuntanza tamén se acordou adaptar os Estatutos da Federación á “visión de xénero” e á Lei de Igualdade, o que converte á FEGAPE en pioneira neste sentido no noso país.