Un traballador dunha fundación paraestatal foi arrestado despois da agresión que sufriron o pasado 13 de agosto doce periodistas do grupo de prensa privado Cadena Capriles, en Venezuela, segundo informa Reporteros sin Fronteras.

A organización manifesta o seu apoio ás redaccións de Cadena Capriles e lamenta que o goberno se vexa cada vez máis desbordado por uns militantes extremistas, nun contexto de novas lexislacións controvertidas e peches de medios de comunicación, e esíxelle ás institucións un verdadeiro debate nacional.

Nova ondada de violencia contra a prensa en Honduras

Reporteros sin Fronteras denuncia tamén a nova ondada de violencia que se desatou a semana do 10 de agosto contra a prensa en Honduras. Estes novos ataques, sinala a organización, son unha mostra do empeoramento da situación xeral da liberdade de prensa desde o golpe de Estado de finais de xuño de 2009.

A organización lamenta que o goberno hondureño poña de manifesto o seu concepto particular de liberdade de prensa a través da censura ou do envío de tropas contra os medios de comunicación que están en contra do golpe de Estado.