A Federación Internacional de Periodistas (FIP) e a súa organización rexional, a Federación de Periodistas de América Latina e o Caribe (FEPALC) expresaron a súa condena máis enérxica polo asasinato do fotoperiodista hispano-francés, Christian Poveda. O seu corpo, tiroteado, atopouse nun suburbio da cidade de San Salvador, segundo confirmaron a policía e o Ministerio de Xustiza e Seguridade do Salvador.

Poveda, de 52 anos de idade, residía en El Salvador desde había uns anos e estaba moi vinculado con ese país, desde onde foi correspondente para diversos medios, especialmente franceses, durante o período da guerra civil salvadoreña (1980-1992). Realizou tamén a cobertura doutros conflitos internacionais e o seu traballo era coñecido en varios países europeos e latinoamericanos.

“Este fotoperiodista trataba de mostrar siempre el lado más oscuro de la pobreza y cómo germina ahí la violencia. Él creía firmemente que su trabajo podía ayudar en la reinserción social de los violentos”, declarou Paco Audije, Secretario Xeral Adxunto da FIP, quen engadiu “Christian Poveda creció en París, pero nació en Argelia, adonde llegaron refugiados sus padres, republicanos españoles, tras huir tras la guerra civil de España. Esos orígenes traumáticos lo acercaban a la tragedia vivida por muchos de sus retratados”.

O seu documental La Vida Loca, exhibido nalgúns festivais, é o resultado de 16 meses de traballo para amosar a vida cotiá das maras, grupos violentos de “pandilleros” que operan en diversos países, pero que teñen, sobre todo, a súa orixe en Centroamérica. De feito, Poveda, que os retratara incluso no interior das penitenciarías, regresaba dun barrio onde operan membros dunha das maras coas que estaba en contacto. En Francia La Vida Loca tiña previsto a súa estrea diante do gran público o vindeiro 30 de setembro.

A FIP e a FEPALC toman nota da condena do presidente, Mauricio Funes, e das autoridades salvadoreñas, que prometeron axilizar a investigación para localizar e castigar os culpables.