Queda unha semana para que os interesados e interesadas en participar no I Certame Raimundo García Domínguez, Borobó envíen os seus artigos de opinión á sede da Asociación de Periodistas de Santiago de Compostela. O premio, cunha dotación de 4.000 euros, outorgarase durante a celebración da I Xornada sobre Periodismo de Opinión, que se desenvolverá o 24 de outubro de 2009. O obxectivo deste certame é honrar a memoria e o labor periodístico de Borobó, o promotor da xeración de La Noche.

O prazo de envío de artigos para concurso finaliza o 10 de outubro de 2009. Na primeira edición deste certame poderán participar persoas maiores de idade de calquera nacionalidade. Os participantes poden entregar varios traballos inéditos, sempre e cando os presenten por separado. Os artigos teñen que estar redactados en galego, de acordo coa normativa da Real Academia Galega. A temática é libre, aínda que no caso de empate, o fallo recaerá sobre o escrito que reflicta unha estreita vinculación entre Santiago de Compostela e Galicia, ou ben que trate sobre calquera aspecto compostelán.

Para máis información, consulte a seguinte ligazón:
http://periodistascompostela.org/index.php/a-asociacion/certame-raimundo-garcia-dominguez-borobo/