A Federación Internacional de Periodistas (FIP) realiza unha chamada a uns 600.000 profesionais de máis dun cento de países para mobilizárense mañá, 5 de novembro de 2009, contra a precariedade laboral e co obxectivo de defender o emprego nos medios de comunicación. O lema de todos estes actos é “En pie por el periodismo”, motivo da convocatoria anual internacional que realiza a FIP.

En España, a Federación de Sindicatos de Periodistas e todos os seus sindicatos afiliados organizan unha serie de actos de protesta baixo o lema “Nuestra precariedad es tu desinformación”, que se desenvolverán en prazas e facultades de Ciencias da Información. Nos medios, as plantillas tamén realizarán concentracións simbólicas con paros para ler o manifesto de denuncia da Federación (FeSP).

O Sindicato de Xornalistas de Galicia (SXG) tamén convoca para mañá participación dos traballadores da información nesta campaña e anima aos profesionais a vestir nas roldas de prensa e actos públicos as camisetas que distribuíu nestes anos. No caso galego, en particular, o SXG reclama que os poderes públicos concreten a petición do Parlamento de vincular as axudas aos medios co mantemento do emprego estable.

A finalidade da convocatoria da FIP, que se realiza por terceiro ano consecutivo, é a de reclamarlles aos poderes públicos medidas para garantizar o dereito dos cidadáns a unha información veraz e de calidade. Estas mobilizacións desenvólvense nun momento en que están en perigo miles de postos de traballadores da información en todo o mundo.