No día contra a violencia de xénero, a Agrupación de Mulleres Xornalistas da Asociación de Periodistas de Santiago de Compostela quere manifestar:

-a solidariedade con todas as mulleres, especialmente coas que sufriron ou sofren violencia polo feito de pertenceren ao xénero feminino. E non nos referimos a sociedades e culturas afastadas de nós, polo contrario, hai que recordar que, segundo Amnistía Internacional, a violencia de xénero é a primeira causa de morte en Europa en mulleres entre 16 e 44 anos.

-A lexislación contra o maltrato non é suficiente para erradicar da sociedade a violencia contra as mulleres. Desde a AMX pensamos que os medios de comunicación deben colaborar no cambio de mentalidades e en facer posible a igualdade de trato en todos os ámbitos da vida.

-Asumimos como unha obriga visibilizar positivamente o traballo e o papel das mulleres, así como vixiar que os medios informen axeitadamente da violencia que se exerce contra delas desde ámbitos privados ou públicos.

-Esta non pode ser unha xornada única na sensibilización sobre os problemas que nos afectan. Lembremos que no que vai de ano, oficialmente, morreron 49 mulleres en España a mans das súas parellas ou ex-parellas, tres delas en Galicia.

-Como xornalistas temos a posibilidade de contribuír de xeito definitivo na loita contra esta lacra e colaborar na educación das novas xeneracións nun xeito de relacionarse máis equitativo entre os sexos.

Santiago de Compostela, a 25 de novembro de 2009

Agrupación de Mulleres Xornalistas da Asociación de Periodistas de Santiago de Compostela (AMX-APSC)