A Asociación de Periodistas de Santiago de Compostela inaugurará a exposición Prensa (en) tendida, publicacións periódicas de Compostela o vindeiro xoves, 17 de decembro ás 19:00 h no Centro Sociocultural de Vite. Con esta mostra, a APSC quere dar a coñecer ao público a grande cantidade e variedade das publicacións periódicas que se editan na cidade compostelá.

Xornais, revistas, anuarios, memorias e boletíns son exemplos das 300 publicacións que conviven en Compostela e que abranguen ámbitos como a cultura, as humanidades, a política, a economía, a ciencia, a investigación ou as novas tecnoloxías. Tamén cómpre destacar a variedade de promotores, desde o ámbito universitario, pasando pola administración autonómica ata os máis variados axentes sociais: escolas, institutos, asociacións, sindicatos, empresas, arzobispado, etc.

Máis dun cento de exemplares ilustrarán esta mostra baixo o título de Prensa (en) tendida, na que se realiza unha comparación cun proceso de lavado e secado da roupa. Así, a través dunha serie de paneis informativos achegaranse datos, gráficas e porcentaxes relativas referidas á temática, promotores, tipoloxías, ámbito de distribución ou lingua. Por outra parte, as publicacións pendurarán nun conxunto de tendais; nunha mesa de pasar o ferro ou mesmo en cestos de roupa. Os exemplares estarán accesibles para que o público os poida palpar e manexar.

A exposición, en definiva, pretende amosar que Santiago de Compostela é o centro de publicación de prensa periódica máis importante de Galicia. Prensa (en) tendida é unha exposición de carácter itinerante e percorrerá os centros socioculturais da cidade. A mostra da APSC conta coa colaboración da Deputación da Coruña e do Concello de Santiago. A súa execución correu a cargo da empresa Holística.