Caricatura de Alfredo Vicenti realizada por Castelao

A Asociación de Periodistas de Santiago de Compostela decidiu este ano 2010 a celebración do Patrono dos Xornalistas, San Francisco de Sales, organizando unha serie de actos tendentes á recuperación da vida e obra de Alfredo Vicenti (1850-1916). Nado en Santiago e considerado como un “mestre de mestres” do xornalismo español da época. Neste sentido a APSC presentará o libro Alfredo Vicenti. Vida e obra de un gran periodista, un documentado traballo cuxo autor é o xornalista Baldomero Cores Trasmonte, membro da Directiva da APSC, e que será dado a coñecer diante de profesores e alumnos da facultade de Ciencias da Comunicación o mercores 20 de xaneiro as 18.00 horas. Tamén terá lugar un acto oficial o sábado 23 ás 13 horas na sala de conferencias da Fundación Araguaney (Montero Ríos, 23).

En ambos os dous actos, xunto con colaboracións nos medios composteláns, a APSC porá de manifiesto a importancia que para Santiago, Galicia e España tivo Alfredo Vicenti Rey, que nacera na santiaguesa rúa da Cerca ou do Picho da Cerca, e que amais de xornalista foi médico, poeta e político republicano. Formouse profesionamente sendo moi novo en El Diario de Santiago. Por discrepancias coa curia eclesiástica abandonou a capital galega para instalarse en Madrid onde fundou a Asociacion da Prensa de Madrid a finais do século XIX. Atraído pola exemplar figura de Manuel Murguía formou parte de La Ilustración Gallega y Asturiana, da que foi director na última etapa. Tamén dirixiu os diarios El Globo e El Liberal, un dos diarios máis importantes da época.