“Chegou outro 8 de marzo e lembramos todo o que fai da vida de moitas mulleres unha continua carreira de obstáculos. É certo, moito temos avanzado; pero en moitos eidos aínda é todo apariencia. Cando a opinión dunha muller sexa tan tida en conta como a dun home, cando o perfil profesional dunha muller só se elabore sobre as súas capacidades laborais, cando ser nai non sexa un problema senón unha vantaxe social, cando non haxa homes á defensiva porque se sinten ‘agredidos pola muller moderna’ … daquela falaremos de igualdade. Daquela, as xornalistas xa non seremos ‘xuíz e parte’ na transmisión de modelos tradicionais que xa non teñen cabida no futuro dun mundo máis xusto para todos.”

Por Xulia Campo, presidenta da Agrupación de Mulleres Xornalistas da APSC.

A Federación de Asociacións de Periodistas de España (FAPE) denunciou hoxe a fenda salarial e profesional que separa ás mulleres xornalistas dos seus colegas homes, co motivo da celebración do Día Internacional da Muller. A Federación fixo deste xeito unha chamada aos axentes sociais para que promulguen políticas que favorezan o acceso da muller á profesión, promovan a equiparación de salario cos seus compañeiros e faciliten o ascenso a postos de responsabilidade.

A FAPE incide ademais na batalla pola concilicación da vida profesional e a privada. “A precariedade da profesión convértenos nun dos colectivos que peor computa nesta materia”, sinala a Federación. “Preferimos falar da nosa vida privada antes que da vida familiar, posto que os profesionais mozos retrásana ata idades alarmantes, freados polas nefastas condicións laborais que hoxe en día ofrece o mercado”.

[Pulsa para ler o resto da noticia]