A organización elabora a lista de “inimigos de Internet” e conmemora no 12 de marzo o Día mundial contra a censura

A organización Reporteros Sin Fronteras elabora un informe no que explica as dificultades da liberdade de expresión na época do predominio de Internet. Coa divulgación deste informe a entidade celebra o 12 de marzo o día mundial contra a censura.

A loita pola liberdade da información é máis frecuente en Internet e os países forzan cada vez máis o control.  Nos países autoritarios, onde os medios de comunicación tradicionais están controlados polos réximes, Internet ofrece un espacio de discusión e intercambio de información e funciona como motor da mobilización. Os novos medios, e sobre todo as redes sociais, permiten cuestionar a orde social establecida. Pero malia isto, aínda existe censura na web: grazas ás últimas ferramentas tecnolóxicas, rexístrase censura de contidos políticos e sociais; arrestos e intimidacións de internautas, vixiancia permanente e control; aspectos que poñen en perigo o anonimato dos internautas.

Por primeira vez desde a creación de Internet existe xente en prisión (uns 120 blogueiros, internautas e ciberdisidentes) por expresarse libremente na rede. Os países con máis detidos son China (72), seguida de Vietnam e Irán. Os estados están a crear lexislación máis represiva e comezan a aplicala. Sucede así en Xordania, Kazajstán, Afganistán e Iraq. As leis tamén se están a revisar no mundo occidental: Australia, Francia, Italia e Gran Bretaña. Non sucede o mesmo nos países escandinavos. É o caso de Finlandia que en xullo de 2010 vai convertir o acceso a Internet nun dereito fundamental.

En 2009 ao redor de sesenta países exerceron algún tipo de censura na web, o dobre que en 2008.  A lista de inimigos de Internet establecida por Reporteros sin Fronteras xunta este ano aos principais países que violan a liberdade de expresión na web. Algúns queren impedir o acceso dos seus cidadáns a Internet: Birmania, Corea do Norte, Cuba e Turkmenistán. Noutros, os obstáculos técnicos e financeiros mestúranse co control do Estado mediante cortes da rede ou coa disminución da velocidade. Arabia Saudí e Uzbekistán incitan aos seus internautas á autocensura. China, Exipto, Túnez e Vietnam apostan por unha estratexia de desenvolvemento da infraestructura cun obxectivo económico, controlando sempre o contido político e social. Algúns países democráticos están “baixo vixiancia”. En Australia vaise implantar un sistema avanzado de filtrado da web e en Corea do Sur hai leis moi estritas que controlan os internautas, incitándoos á autocensura. Turquía e Rusia tamén están nesta lista de países e córrese o risco de que Internet se convirta nunha ferramenta de control político. Outros países, “vixiados” son Emiratos Árabes Unidos, Bielorrusia e Tailandia, segundo as conclusións do informe de RSF.