De esquerda a dereita: Luís Menéndez, presidente da Asociación de Periodistas de Santiago de Compostela, Alfonso Cabaleiro, secretario Xeral de Medios, Alberto Núñez Feijoo, presidente da Xunta de Galicia, Elsa González Díaz, presidenta da FAPE, José Francisco Rodil vicepresidente da Asociación da Prensa de Santiago e Xulia Campo,  presidenta da Agrupación de Mulleres Periodistas da APSC.

• A nova presidenta da Federación, Elsa González Díaz, presenta o seu programa de traballo a Alberto Núñez Feijoo, na súa primeira visita a un mandatario autonómico

O presidente da Xunta, Alberto Núñez Feijoo, manifestou o seu rexeitamento ás roldas de prensa sen preguntas, en respaldo á batalla da Federación de Asociacións de Periodistas de España (FAPE) contra a crecente tendencia deste tipo de convocatorias.

O presidente recibiu unha comitiva da Asociación de Periodistas de Santiago de Comopostela e da FAPE, encabezada pola nova presidenta da Federación, Elsa González Díaz. Neste encontro, transmitíuselle ao presidente da Xunta a preocupación polas comparecencias públicas habituais nas que os xornalistas non poden exercer o seu dereito a interpelar.

A nova presidenta da FAPE aproveitou a ocasión para presentar o seu programa de traballo ao presidente da Xunta de Galicia, con atención especial á precariedade do traballo periodístico e á triple crise: conxuntural, de modelo e tecnolóxica que atravesa a profesión.

Na súa primeira visita oficial a un mandatario autonómico,  González Díaz instou ao presidente da Xunta a corrixir a elevada temporalidade na Compañía Pública de Radio Televisión de Galicia, con case un 90% de periodistas traballando con este modelo laboral.

Neste senso, Núñez Feijoo interesouse polo cambio de modelo nos medios de comunicación, a rendibilidade dos novos medios dixitais e a propiedade das empresas informativas, censurando a compra de cabeceiras por empresarios alleos ao exercicio xornalístico.

O presidente da Xunta tamén recibiu con beneplácito a iniciativa das Asociacións da Prensa de Santiago de Compostela, Navarra, A Rioxa e Castela e León para promover o Xacobeo 2010 entre o colectivo de xornalistas.