Foto: Deputación de Guadalajara. Integrantes do xurado antes da deliberación. De esquerda a dereita: Vicente Romero, Montserrat Domínguez, Carlos Sanz, Marisa Ciriza, Nemesio Rodríguez, María Antonia Pérez León, Paco Audije e Miguel Ángel Aguilar.

A escritora e xornalista mexicana Lydia Cacho foi a galardoada co I Premio Internacional de Periodismo Manu Leguineche polo seu traballo de investigación e denuncia dos dereitos humanos e explotación sexual das mulleres e nenos. O xurado valorou a súa capacidade para exercer o xornalismo dunha maneira “valente e decidida”.

Os membros do xurado, despois de reunírense o luns en Guadalajara, onde compartiron un xantar con Manu Leguineche, fixeron público o seu fallo. Destacaron no labor da xornalista mexicana, o compromiso coa defensa dos dereitos humanos e a calidade do seu traballo. Cacho estivo, ademais, sometida a numerosas presións e ameazas motivadas polas súas investigacións periodísticas sobre redes de pederastia e prostitución.

Na elección da galardoada tamén se tivo en conta a condición de “free lance” de Lydia Cacho, que exerce o seu labor sen o respaldo económico dun medio de comunicación.

O galardón foi convocado conxuntamente pola Deputación de Guadalajara e a Federación de Asociaciones de Periodistas de España (FAPE), en colaboración coa Federación Internacional de Periodistas (FIP) e a  Asociación de Periodistas Europeos (APE).