A Asociación de Periodistas de Santiago de Compostela (APSC) amousou a súa dor e consternación pola morte da xornalista Mariña Folgueira Portela, quen fixera case que toda a súa carreira profesional á fronte do departamento de prensa do Parlamento de Galicia. Previamente traballara tamén en Radio Nacional de España en Galicia. Mariña Folgueira foi sempre unha compañeira que facilitou moitísimo o labor dos equipos de xornalistas especializados en información política e parlamentaria xa desde os tempos iniciais da autonomía galega. Gozaba do respecto e da calidade profesional por parte de todos e era moi coñecida nos círculos xornalísticos de Compostela. A APSC quere enviar unha sentida aperta de afecto a todos os seus familiares e amigos, e especialmente tamén ao seu home, Xosé López, compañeiro xornalista e catedrático de Xornalismo na USC.

A Asociación de Periodistas de Santiago de Compostela (APSC) vese na obriga, unha vez máis, de lamentar fondamente a desaparición dun medio de comunicación de Galicia, neste caso a edición en papel de Xornal de Galicia, que deixará e difundirse o xoves 4 de agosto. Esta situación é máis grave aínda, se cabe, xa que Xornal de Galicia tiña unha especial dedicación ao fomento do galego escrito, que compaxinaba co castelán, co cal Galicia perde outro medio de expresión que utiliza a lingua propia, como anteriormente pasara con A Nosa Terra e Galicia Hoxe, desaparición que tamén criticou esta asociación.

A APSC demanda aos responsables empresariais do periódico que eviten que os traballadores do mesmo queden no paro, buscando a súa ubicación na edición dixital de Xornal, ou noutras alternativas para evitar que outro grupo de xornalistas queden na rúa.