•    Cúmprese o 150 aniversario de Sofía Casanova entre o esquecemento xeral

Tal día coma hoxe, 30 de setembro, pero hai 150 anos, nacía na que é hoxe céntrica rúa de San Andrés da Coruña a prolífica xornalista, escritora e poetisa Sofía Casanova Lutoslawsky, que morrera en Pòznan (Polonia) no ano 1958. Sofía Casanova foi basicamente coñecida por ser correspondente durante moitos anos do diario madrileño ABC para o que relatou os máis importantes acontecementos históricos do século XX, como a caída dos zares, a revolución bolxevique ou as dúas guerras mundiais. A xornalista galega viviu en primeira persoa e nos propios escenarios daqueles fitos mundiais porque residiu maiormente en Polonia, pero tamén en San Petersburgo, Moscova, Londres ou Paris. Chegou a entrevistar a Trosky nos comezos da revolución de 1917, relatou con horror a chegada das vítimas “gaseadas” durante a Gran Guerra onde tamén exerceu como enfermeira da Cruz Vermella, padeceu a irrupción bélica dos nazis en Varsovia e sufriu tamén a represión do estalinismo. Escribiu 20 libros, milleiros de artigos, ensaios e poemarios nos que non desbotou as súas raíces galegas. Mantivo relación con personaxes da época como Alfredo Vicenti, Emilia Pardo Bazán ou Castelao. De cando en vez viña por Galicia, onde tiña casa na Coruña e en Mera, onde naceu unha das súas tres fillas, Halina. Era membro correspondente da Real Academia Galega, institución que chegou a propoñela para o Premio Nobel.

[Pulsa para ler o resto da noticia]