A recente campaña internacional “Stand-up for journalism” (En pé polo xornalismo) organizada pola Federación Internacional de Xornalistas na que estamos integrados 600.000 xornalistas de todo o mundo facía fincapé no deterioro progresivo da liberdade de expresión durante o ano 2008 e no risco mesmo de morte en países como Iraq, India, México, Filipinas, China, Rusia, Cuba ou Paquistán amén de numerosos países africanos onde a democracia é aínda algo teórico alleo á realidade. Só no ano pasado, segundo datos da FIP, morreron 104 xornalistas en tarefas profesionais e 137 seguen encarcerados, segundo Reporteiros sen Fronteiras. Nos países supostamente adiantados, co frenético desenvolvemento de internet e a consabida presión dos grupos poderosos o problema radica na veracidade, calidade e rigor dos contidos.
Alén diso existen coincidencias no diagnóstico que nos próximos días vai sacar á luz o Informe Anual da Profesión Periodística en España. Aí vaise demostrar tamén como a crise xa está facendo moito dano nas redaccións e colectivos profesionais, principais víctimas cando o editor ou empresario da comunicación ve minguar os seus resultados polo descenso, sobre todo, dos ingresos publicitarios.
Pero hai que facer da necesidade virtude. Se hai algo positivo en todo este barullo é a crecente capacidade de interconexión que as novas tecnoloxías nos ofrecen. A inmediatez é xa un valor poderosísimo e constado. Desde as organizacións, e mesmo individualmente, estamos ao tanto do que lle sucede a colegas con problemas que están no outro lado do mundo. Recentes acontecementos como a liberación do noso paisano José Cendón en Somalia, o seguemento do caso de Lydia Cacho en México, a prohibición de entrada dos informadores en Gaza, son acontecementos que sentimos xa como propios, próximos, e nos que nos sentimos solidarios, efectivos mesmo para cooperar na súa resolución. Desde Santiago de Compostela, cidade galega, mundial, plurilingüe e cosmopolita, temos a mellor das plataformas europeas para facer realidade o intercambio internacional.
Luís Menéndez Villalva Presidente Asociación de Periodistas de Santiago de Compostela (APSC)
